O Grove vai ao baile
En dous minutos | Cen parellas de danzaríns no Monte da Vila
Cando se está de festa non hai nada como deixar que os pés dancen. Ben o saben os mecos. Na súa vila, hoxe, celebrarase un torneo de bailes de salón
Hai uns anos, a concellería de Servizos Sociais do Grove decidiu impartir clases de bailes de salón. A iniciativa non tardou en callar entre os mecos, que aparcaron a vergoña e sacaron aos danzaríns que levaban dentro. Pouco a pouco foi medrando o grupo de adeptos a esta arte do baile de salón. E medrou tanto que este ano, hoxe en concreto, o pavillón do Monte da Vila vaise converter en escenario do primerio trofeo de bailes de salón do Concello do Grove.
Máis de cen parellas vanse disputar os aplausos do público e os 5.000 euros que suman os premios ofertados para as distintas categorías. Pola pista pasarán brincando con gracia os participantes máis cativos, e pola mesma pista pasarán tamén, coa sobriedade que da o tempo, os competidores da categoría senior -un grupo que, por certo, non adoita a deixarse ver nas exhibicións-.
Todo iso será a partir do mediodía. Aqueles que gosten da danza terán unha magnífica ocasión para degustar cos ollos todo o dramatismo do tango. Todo o ritmo do cha-cha-chá. Todo o sabor do merengue. Ou toda a elegancia do vals.
Outros praceres
Pero ademais de gozar do baile, o público que hoxe acuda ao pavillón disfrutará tamén da música que envolverá aos danzaríns durante toda a xornada. E no só deso. Porque nos encontros de bailes de salón a atmósfera é outra das cousas das que se aprende. Esa atmósfera cargada de carmín, de sombra de ollos, de mulleres de cabelo recollido, de zapatos de tacón, de traxes que recordan aos grandes musicais de Hollywood. Esa atmósfera chea tamén de nervios, de estrés, de traballo duro para aprender a mellor coreografía. A concelleira Ana Isabel Domínguez confía en que hoxe todo saia ben. «Ya hemos hecho algunas exhibiciones a pequeña escala, pero es la primera vez que hacemos una así, a lo grande», explica a concelleira.
Para que todo saia ben, o concello conta coa colaboración da escola de baile Passos, de Pontevedra. Toda unha institución no que a danza se refire.
Pavillón de deportes. 12.00 horas.
http://www.lavozdegalicia.es/ed_arousa/noticia.jsp?CAT=113&TEXTO=5277133
Foro 
